Administradór Munisípiu Viqueque, Gregório Henriques hato’o votus parabéns ba aniversáriu Ajénsia Tecnologia da Informação e Comunicação (TIC) TIMOR I.P ba datoluk no apresia ho TIC TIMOR tanba apoiu ona servisu munisípiu nian liu-liu iha área informátika.

Nia dehan, antes ne’e susar tebes atu asesu ba liña internet liu-liu funsionáriu sira iha parte finansas no aprovizionamentu tanba tenke ba nasionál hodi asesu ba sistema Freebalance no Dalan ba Futuru maibé hafoin prezensa TIC TIMOR I.P nian iha Munisípiu Viqueque apoiu tebes servisu iha Administrasaun Munisipál.

Iha âmbitu aniversáriu Ajénsia Tecnologia da Informação e Comunicação (TIC) TIMOR I.P, Administradór Munisípiu Cova-Lima, Afonso Nougeira Nahak husu atu apoiu mós servisu informátika iha Postu Administrativu sira nune’e bele fasilita servisu iha Postu Administrativu sira.

Nia mós agradese ba Ajénsia TIC TIMOR ba fornesimentu servisu ne’ebé Ajénsia oferese tanba ajuda ona sira nia servisu hodi asesu ba sistema finansas nian hanesan sistema Freebalance, Dalan ba Futuru nomós sistema Email ofisial.

Prezidente Autoridade Munisípiu Ermera, José Martinho dos Santos, hato’o parabéns ba aniversáriu Ajénsia Tecnologia da Informação e Comunicação (TIC) TIMOR I.P ba datoluk no apresia ho servisu ne’ebé Ajénsia fornese tanba fasilita servisu Munisípiu Ermera nian ba iha nasionál.

Prezensa TIC TIMOR I.P nian, ajuda no fasilita ona servisu Munisípiu ba Nasional nomós Ba Internasionál, fornese informasaun importante atu konsulta servisu ne’ebé lais liu, la presiza gasta osan no material hodi halo movimentu entre Munisípiu no servisu iha Nasionál.