PREZENSA TIC TIMOR I.P, FASILITA ONA SERVISU MUNISÍPIU ERMERA BA IHA NASIONÁL

Prezidente Autoridade Munisípiu Ermera, José Martinho dos Santos, hato’o parabéns ba aniversáriu Ajénsia Tecnologia da Informação e Comunicação (TIC) TIMOR I.P ba datoluk no apresia ho servisu ne’ebé Ajénsia fornese tanba fasilita servisu Munisípiu Ermera nian ba iha nasionál.

Prezensa TIC TIMOR I.P nian, ajuda no fasilita ona servisu Munisípiu ba Nasional nomós Ba Internasionál, fornese informasaun importante atu konsulta servisu ne’ebé lais liu, la presiza gasta osan no material hodi halo movimentu entre Munisípiu no servisu iha Nasionál.

Nia informa, TIC TIMOR I.P ajuda tebes munisípiu nia servisu loroloron tanba apoia ona liña Internet no servisu Informátika. Prezensa TIC TIMOR nian ajuda mós Autoridade Lokál ba Korrespondénsia servisu ne’ebé liga ho Internet no ajuda fasilita Munisípiu nia servisu di’ak liu tan.

Nia sujere, TIC TIMOR I.P tenke hadi’a nafatin fornesimentu liña Internet la’ós de’it iha Munisípiu maibé bele kobre mós Postu Administrativu sira atu fasilita servisu iha Munisípiu to’o postu administrativu sira.

Ajénsia tenke kontinua servisu ho di’ak, tanba Ajénsia iha devér importante ba kontribuisaun dezenvolvimentu atu alkansa objetivu no metas ba dezenvolvimentu nasionál iha futuru, tanba bainhira Ajénsia kontinua halo servisu ho di’ak to’o baze hodi enkoraja komunidade sira atu bele adapta teknolojia ho di’ak. #MÉDIA TIC#