DIRETÓR EZEKUTIVU TIC TIMOR ABERTURA FORMASAUN SISTEMA CLOUD GoTL BA FUNSIONÁRIU CNE

DILI, 23 Maiu 2024—Diretór Ezekutivu Ajénsia TICTIMOR I.P., Sr. Venậncio Pinto S.Kom hamutuk ho Vise-Prezidente Komisaun Nasionál Eleisaun sigla portugues (CNE) Sr. Domingos Barreto  halo abertura ba formasaun Sistema Colud GoTL, ne’ebé dezenvolve husi TIC TIMOR ba funsionáriu CNE husi nasionál nomós Munisípiu 12. 

Objetivu husi sistema ne’e, atu halo transformasaun sistema manual ba eletróniku hodi hafasil servisu CNE nian husi nasionál to’o Munisípiu. 

Iha serimónia abertura ba formasaun ne’e, Diretór Ezekutivu TIC TIMOR I.P., Sr. Venậncio Pinto S.Kom hateten, TIC TIMOR ninia papél iha programa IX Governu Konstitusionál atu haree kona-ba teknolojia informasaun no komunikasaun ne’ebé atu responsabiliza ba hosting, kolokasaun server nomós seguransa sistema sira. 

Iha programa seluk husi IX Governu Konstitusionál ko’alia kona-ba Governu Eletróniku tanba ne’e, TIC TIMOR ninia responsabilidade atu transforma sistema manual sira ba eletróniku. 

Iha preparasaun adezaun ba ASEAN nian, iha rekejitu ida ne’ebé fó mai TIC TIMOR tenke dijitaliza hotu sistema sira nomós kona-ba segurana sibernétika. Ho ida ne’e TIC TIMOR hahú halo mudansa liuhusi sistema dijitalizasaun sira. 

Lider Másimu TIC TIMOR ne’e esplika, kona-ba sistema sira ne’ebé TIC TIMOR oferese ba CNE parte ida husi programa Governu Eletróniku tanba ne’e, husu ba formandu sira atu aproveita oportinidade ida ne’e, hodi utiliza sistema hirak ne’e ho di’ak.

“Liu husi sistema dijitalizasaun sira ne’e hamosu efisiensia no efikasia ba prosesu servisu ne’ebé fasil liu,” dehan Diretór Ezekutivu.  

Diretór Ezekutivu mós agradese ba CNE ne’ebé depozita ona konfiansa ba TIC TIMOR hodi habelar dijitalizasaun tuir programa IX Governu nian.

Iha fatin hanesan, Vise-Prezidente CNE Sr. Domingos Barreto hateten, formasaun ida ne’e, importante tebes tanba mundu agora tama ona ba iha era teknolojia no Timor-Leste mós hanesan nasaun ida buka atu labele husik hela sistema dijitalizasaun sira ne’ebé nasaun seluk iha.

Adjuntu Prezidente CNE informa katak, agora dadauk Timor-Leste nia preparasaun atu adere ba ASEAN ko’alia mós asuntu tekonlojia ne’ebé importante tebes tanba nasaun seluk avansadu ona.

Ho ida ne’e, nia parte enkoraja nafatin formandu sira atu bele aproveita formasaun ne’e ho di’ak atu bele instala sistema sira ba eletróniku atu bele sai hanesan mós ho nasaun seluk.

Serimonia abertura ne’e, partisipa mós husi Diretór Diresaun Dezenvolvimentu Sistema Informasaun no Aplikasaun (DDSIA) Sr. Justo Fernandes no Diretór sira husi CNE.

Entretantu formasaun ne’e, hala’o durante loron rua iha salun CNE Kaikoli. 

(MÉDIA TIC)