MUNISÍPIU VIQUEQUE AGRADESE BA APOIU SERVISU HUSI TIC TIMOR I.P

Administradór Munisípiu Viqueque, Gregório Henriques hato’o votus parabéns ba aniversáriu Ajénsia Tecnologia da Informação e Comunicação (TIC) TIMOR I.P ba datoluk no apresia ho TIC TIMOR tanba apoiu ona servisu munisípiu nian liu-liu iha área informátika.

Nia dehan, antes ne’e susar tebes atu asesu ba liña internet liu-liu funsionáriu sira iha parte finansas no aprovizionamentu tanba tenke ba nasionál hodi asesu ba sistema Freebalance no Dalan ba Futuru maibé hafoin prezensa TIC TIMOR I.P nian iha Munisípiu Viqueque apoiu tebes servisu iha Administrasaun Munisipál.

Tanba ne’e, nia parte agradese ba servisu ne’ebé Ajénsia fornese ona ba Munisípiu Viqueque atu kontinua servisu ho kualidade no hametin liu tan kooperasaun servisu ho munisípiu Viqueque.

Entretantu Autoridade lokál ne’e, enkoraja nafatin TIC TIMOR I.P, atu kapasita nafatin pesoál ne’ebé destaka iha Munisípiu sira atu nune’e bele aumenta sira nia koñesimentu iha área informátika atu nune’e sira bele hala’o sira nia servisu di’ak liu tan   #MÉDIA TIC