AJÉNSIA TIC TIMOR I.P SELEBRA ANIVERSÁRIU DARUAK HO MISA AGRADESIMENTU

AJÉNSIA TIC TIMOR I.P SELEBRA  ANIVERSÁRIU DARUAK HO MISA AGRADESIMENTU

DILI, 05 Setembru 2019

Ajénsia Tecnologia da Informação e Comunicação (TIC) TIMOR I.P selebra nia aniversáriu ba dala rua ho tema “ToGether- To Get There” ne’ebé signifika servisu ekipa, servisu hamutuk, neneik maibé bebeik, liu husi kosar ben, ba objetivu desenvolmentu nasionál hodi moris di’ak ba povu Timor-Leste.

Iha selebrasaun ba loron espesiál ne’e, hahú ho misa agradesimentu ne’ebé prezide husi Padre Yohanes Laba SDB, iha Kapela Dom Bosco Comoro.

  Iha nia omilia Padre hateten, nu’udar ema kriatura, presiza hasa’e agradesimentu no presiza servisu hamutuk iha grupu ida.

Padre afirma, iha dezafiu boot ne’ebé dala barak akontese maka la fiar malu no laiha étika servisu tanba ne’e tenke iha konfiansa ba malu.

 Nia mós husu ba funsionáriu sira atu hatene husu tulun, hatene husu deskulpa no tenke hatene agradese.

 Iha fatin hanesan, Xefe Gabinete Primeiru Ministru (GPM) Afonso Henrique Corte Real, lori Primeiru Ministru Taur Matan Ruak nia naran, agradese ba servisu Ajénsia nian ne’ebé tama ona ba tinan rua servisu hamutuk iha GPM hodi suporta malu no respeita instituisaun públiku ne’e nia servisu liu husi orientasaun PM nian.

TIC TIMOR nu’udar únika forma ne’ebé haree ba Governu eletróniku tanba ne’e labele halai husi teknolojia maibé tenke iha kontestu teknolojia.

Alende ne’e, Diretór Ezekutivu Ajénsia Tecnologia da Informação e Comunicação TIC TIMOR I.P Roberto Caitano de Sousa Vicente hateten, bainhira tau esforsu hamutuk, sei alkansa objetivu tuir knar ne’ebé iha.

Nia dehan, Ajénsia ne’e ho nia estatutu hanesan, institutu públiku tuir dekretu lei 29/2017 no iha nia administrasaun rasik no tutela diretamente iha Gabinete Primeiru Ministru. TIC TIMOR I.P nia misaun atu implementa polítika no estratéjia iha área teknolojia hodi Jere informátika Governu nian ba entidade públiku sira inklui infraestrutura teknolojia no komunikasaun.

TIC TIMOR iha nia planu estratéjiku ho modelu enkuadramentu hodi implementa polítika governu eletróniku iha VIII Governu Konstitusionál no governasaun tuir mai. Iha planu estratéjiku ida ne’e, fahe ba planu kurtu, médiu no longo prazu husi planu tinan lima fahe fila fali ba planu annual.

Iha planu 2020 iha funsaun públika ida ne’ebé adota teknolojia governu, inklui fó apoiu ba governu tama nomós iha inisiativa liga ba governu eletróniku.Ajénsia prodúz ona draft ba planu estratéjiku governu eletróniku hahú husi tinan 2019 to’o 2020, asesu ne’ebé liga ba internet.

Agora dadauk halo ona ligasaun ba Munisípiu 12 no halo ona ligasaun ba iha ministériu balun no Ajénsia balun ne’ebé hetan ona konetividade husi TIC TIMOR.

Divizaun ne’ebé iha hanesan, aplikasaun ho website lubun boot ba Ministériu sira ho kustu ne’ebé zero hodi halo poupansa signifikativu ba investimentu Governu nian iha website, la’ós de’it ba iha Ministériu maibé haree mós ba Munisípiu hotu.

Iha mós divizaun infraestrutura ne’ebé haree ba rede governu nian hahú husi nasionál to’o iha Munisípiu hodi fó apoiu tomak ba ligasaun ne’ebé mai husi TIC TIMOR no direta ba instituisaun estadu sira to’o iha Munisípiu sira.

Xefe Ezekutivu hateten, TIC TIMOR mós kontinua halo aproximasaun ho ministériu, sira seluk hodi fahe informasaun kona-ba existensia TIC TIMOR no tarefa servisu sira. To’o agora, TIC TIMOR I.P halo ona aprezentasaun ba Instituisaun estadu ho total 13.

Diretor Ezekutivu lori TIC TIMOR I.P nia naran, hato’o agredesimentu wa’in ba apoiu tomak husi  Primeiru Ministru ho nia gabinete ba TIC TIMOR, hodi kontinua tau matan ba importánsia no tarefa servisu TIC TIMOR ne’ebe atribui tuir Lei.

Nia mós hato’o apresiasaun ba membru Konselu Adminitrasaun TIC TIMOR I.P, ne’ebé kontinua sai hanesan defensor ba TIC TIMOR iha kna’ar lor-loron. Hein katak iha 2020, bele hahú ativa membru BoD sira bainhira TIC TIMOR goza duni  nia estatutu autonomia ho nia Chart of Account rasik.

 Hakarak hato’o apresiasaun ba linha ministériu sira, Autoridade Munisipiu sira ne’ebé fó fiar no koopera hamutuk ho TIC TIMOR hodi fornese fasilidade infraestrutura ba entidade guvernu tomak.Ba parseiru organizasaun internasionál no nasionál sira ne’ebe mos kopera tebes ho TIC TIMOR

Ba funsionáriu TIC TIMOR tomak ne’ebé servisu makaas ho dedikasaun tomak nune’e, iha tinan 2 nia laran, TIC bele atinji servisu lubun bo’ot ida no bele oferece solusaun iha área teknolojia ba insituisaun estadu tomak.

Entretantu aniversáriu Ajénsia TIC TIMOR I.P nian loloos monu iha loron 29 fulan agostu maibé tamba ho selebrasaun nasionál iha 30 agusto hodi relembra loron konsulta popular iha 99  nune’e adia ba loron 05 fulan setembru. #Média TIC#