TÉKNIKU INFRAESTRUTURA AJÉNSIA TIC TIMOR I.P KONTINUA APREZENTA PROJETU FOT BA CAMSTL

Ekipa tékniku infraestrutura Ajénsia Tecnologia da Informação e Comunicação (TIC) TIMOR I.P kontinua halo aprezentasaun projetu Fibra Ótika Terrestre (FOT) ba ekipa tékniku Centro Audiovizuál Max Stahl Timor-Leste (CAMSTL) no iha posibilidade sei halo kooperasaun servisu liu husi governasaun eletróniku hodi mellora liu tan servisu Centro Audiovizuál ne’e nian.

Iha sorumutu ne’e, Tékniku Infraestrutura Henrique Guterres aprezenta, objetivu husi projetu ne’e,   atu kria rede governu nian rasik ba Munisípiu no kobre mós iha Dili, liu husi Oli Pezadu ne’ebé liga husi tore EDTL hodi dada tutan ba sub estasaun sira, ba Autoridade Munisípiu no iha futuru sei sai distributor iha munisípiu idak-idak.

 Vantajen husi projetu ida ne’e, atu halo governu la depende ba operadór telekomunikasaun ne’ebé eziste iha TL, no redús kustu ba asesu konteúdu lokál sira, hanesan Dalan ba Futuru, ba planeamentu.  Projetu dahuluk ba Fibra Ótika Terrestre, kompleta ona iha Munisípiu 12 ne’ebé iha ona koneksaun diretamente ba iha TIC TIMOR I.P.  

Nia informa, rede ne’ebé fahe ba Munisípiu iha zona tolu maka hanesan, zona ida kompostu husi Dili, Manatutu, Aileu no Ermera. Zona rua husi Baukau, Lautem, Vikeke, no zona tolu inklui Cova-Lima, Ainaru, Manufahi no Bobonaro. Projetu Fibra Ótika Terrestre ne’e, agora nia progresu atinje ona 90%. Instituisaun Públiku ne’e mós, halo ona koneksaun ba liña Ministériu balun hanesan MOP, MS, MNEK, MRLAP no GPM.

Instituisaun governu ne’ebé hosting ona iha TIC TIMOR I.P maka hanesan, CNC, MRLAP, AIFAESA, GPM, no single portal mós sei hosting hotu iha ne’ebá. Ministériu sira ne’ebé liga ona maka hanesan MS, MNEK, PCM, MRLAP no SECOMS. Ministériu ne’ebé halo ona pedidu ligasaun ba Rede FOT maka hanesan PNDS, MAE, SEPFOPE, SEJD, PNTL.

Iha biban ne’e, nia mós introdús, Ajénsia ne’e, eziste iha tinan 2017 bazeia ba dekretu lei 29/ 2017 no relata direta ba Gabinete Primeiru Ministru.

Iha fatin hanesan, I.T CAMSTAL, Tony Behar hateten, Centro ne’e nu’udar instituisaun audiovizuál ne’ebé efetivu no ba oin bele servisu hamutuk ho TIC TIMOR I.P. Tanba ida ne’e sai potensiál boot ba CAMSTAL.

Nia informa liu tan, karik iha posibilidade bele koopera ba sistema ne’ebé agora sira   iha, tanba hakarak buat ne’ebé di’ak ba instituisaun ida ne’e no hein katak prezensa TIC TIMOR I.P nian bele servisu hamutuk di’ak liu tan.  #Média TIC#