DIRETÓR INFRAESTRUTURA TIC TIMOR I.P. PARTISIPA IHA SEMINARIU, LANSAMENTU WEBSITE KNTLU NO PALESTRA ANÓ LETIVU 2022 BA KOMUNIKASAUN SOSIÁL (UNTL)

Diretór infraestrutura, Andre Felix Marques, Reprezenta Diretór Ezekutivu Ajénsia Teknolojia Informasaun no Komunikasaun, sigla português, (TIC) TIMOR I.P., partisipa iha Semináriu, lansamentu Website KNTLU  no Palestra Ano Letivu 2022 ba Komunikasaun Sosiál UNTL, iha Salaun Katedrál Dili.     

Iha serimónia ne’e Diretór Infraestrutura, Andre Marques mós hetan konfiansa hodi hato’o ninia diskursu, iha diskursu ne’e, Diretór hateten, kriasaun ba website ne’e importante tebes iha situasaun Covid-19 ida ne’e, hodi bele kria distansiamentu.                                                        

“Semináriu lansamentu Website no Palestra Anó Letivu 2022 ba Komunikasaun Sosiál UNTL nian, marka pasu importante ida iha era Covid-19 nian, tanba kriasaun Website iha tempu pandemia hanesan investimentu komunikasaun dijitál ne’ebé diak tebes ba distansiamentu no fasil liu ba asesu iha ne’ebé de’it kuandu rede internet lao diak, iha sistema komunikasaun hanesan papél ida TIC TIMOR nian liuhosi programa Oitavu Governu bá iha Governu Eletróniku ka E-Government” dehan Diretór.                                                      

Iha biban ne’e mós Diretór halo introdusaun kona-ba papél Ajénsia TIC TIMOR, TIC TIMOR I.P., hanesan Instituisaun Públika harii iha VI Governu Konstitusionál liuhosi Dekretu-Lei no.29/2017 iha 02 Agostu 2017 no Tutela ba Na’i Primeiru-Ministru. Ajénsia ida ne’e harii iha momentu ida ne’ebé ho baze atu dezenvolve diak liu tan setór Informasaun, Comunikasaun no Teknolojia (ICT) hodi hafasil servisu ho kualidade diak ba sosiedade, eleva sira nia koñesimentu nune’e sei promove dezenvolvimentu sósiu ekonómiku, diversifikasaun ekonomia, bem-estar nomos kualidade moris sidadaun sira nian, ne’ebé haree ba Lansamentu Website ba iha Komunikasaun Sosiál UNTL nian, hanesan fontes ida ne’ebé importante tebes ba iha sidadaun juventude RDTL nia bem-estar, informa Diretór.                                     

Diretór Infraestrutura aumenta katak, TIC TIMOR I.P. entende papél importante UNTL nian, hanesan Universidade Nasional Timor-Loro-sae ne’ebé nia papel responsavel ba iha nivel Universitáriu, hanesan Universidade publika primeiru iha tempu Nasaun foun, RDTL restaura ninia Independénsia, harii iha 17 Novembru 2000 hanesan re-organiza ka transforma hosi Universidade Timor-Timur (UNTIM) no Politéknika Dili, ba Universidade Nasional Timor-Lorosa’e, liuhosi lideransa Retór ida.                                             

Papél Universidade Públiku importante tebes ba dezenvolvimentu rekursu umanu sidadaun RDTL nian, razaun sira ne’e, TIC importante tebes ba papél UNTL nian, tanba TIC bele dezenvolve tuir nesesidade UNTL nian nesesidade iha area teknolojia iha kurtu, médiu no longu prazu hodi fasilita diak liu tan prestasaun aprendizajen sidadaun nian iha area akademia no servisu administrasaun Universidade nian. Ajénsia TIC TIMOR bele transforma Sistema mahanorin sira no estudante sira nomos servisu administrasaun UNTL nian ne’ebé iha agora mais elektróniku, liu-husi utilizasaun servisu Teknolojia, Informasaun no Komunikasaun, liuhosi papél TIC TIMOR nian iha oitavu Governu, dehan Diretór ne’e.

Diretór realsa tan katak, liuhosi semináriu lansamentu Website iha Departamentu Sosiál Komunikasaun UNTL nian, sei lao diak liu tan iha liña koneksaun ba iha TIC TIMOR, hodi kontribui ba esforsu servisu hamenus gastu la nesesáriu sira iha area Informátika, sentraliza no asegura dokumentu no informasaun iha Sentru-dadus Governu Eletróniku, fasilita asesu ba padraun Teknolojia no aplikasaun ne’ebé modernu, seguru, atualizadu, dezenvolvidu no asegura husi Timor-oan rasik.  

Iha biban ida ne’e, Diretór mós  hato’o parabéns ba UNTL ho lansamentu website KNTLU ida ne’e bele hafasil  estudante sira hodi asesu  aprendizajen liu husi online nune’e bele hamenus sura tahan.                                                                                                                                          

“Ho lansamentu Website KNTLU nian ohin, no ano letivu 2022 ba Komunikasaun Sosiál UNTL nian, ami hosi TIC hato’o ami nia parabens no bom susesu ba iha UNTL hodi alkansa objetivu manorin liuhosi liña eletróniku, ne’ebé responde ba situasaun atuál iha tempu pandemia, Covid-19 no hafasil asesu aprendizajen estudante sira nian, iha era miléniu liuhosi dalan dijitál hodi hamenus komunikasaun sura tahan, tan ne’e komunikasaun importante tebes, liuhosi Website no E-mail, hanesan maneira fasil no baratu hodi komunika iha era ida agora, kuandu presiza distansiamentu no hamenus halibur ema barak iha fatin ida, liuliu ita agora iha Timor ema barak ona asesu ba telemovel”, informa Diretór iha ninia diskursu.     

Bainhira remata  diskursu Diretór mós la haluha hato’o obrigado barak ba UNTL tanba fó ona fiar ba TIC TIMOR ba kooperasaun servisu, no ba oin bele servisu hamutuk hodi bele dezenvolve liu tan Governu Eletróniku hodi hamenus gastus ne’ebé la nesesáriu. 

“Lori Diretór Ezekutivu ho naran Ajénsia TIC TIMOR nian, ha’u hakarak hato’o obrigado barak ba Reitór UNTL, Xefe Departamentu Komunikasaun Sosiál UNTL nian, ba fiar no kooperasaun mai ami, hanesan ajénsia Teknolojia, Informasaun no Komunikasaun Governu nian ne’ebé habelar servisu ba entidade estadu sira hotu hodi bele sai Governu-Eletróniku, objetivu hamenus gastu la nesesáriu sira liuhosi komunikasaun bele hafasil servisu administrasaun governu nian, hanesan Tékniku Timor-oan, ne’ebé iha ona koñesimentu ne’ebé diak tebes hodi fornese solusaun informátika ba Instituisaun Governu sira hotu, no empreza públiku sira hotu Governu nian” hateten Diretór.

Iha serimónia ne’e partisipa mós husi, Sekretáriu Ezekutivu KNTLU, Reitor UNTL, Xefe   Departamentu Komunikasaun Sosiál, Estudante UNTL husi Departamentu Komunikasaun Sosiál.   #Média#TIC.