PREZIDENTE AUTORIDADE MUNISIPIU AILEU APRESIA HO SERVISU AJÉNSIA TIC TIMOR I.P

Ajénsia Tecnologia da Informação e Comunicação (TIC) TIMOR I.P, kontinua halo rotasaun ba funsionáriu Helpdesk iha munisípiu Aileu, rotasaun funsionáriu Helpdesk ida ne’e akompaña direita husi Vise Diretór Ezekutivu, Justo Fernandes. Rotasaun funsionáriu Helpdesk ne’e hala’o kada fulan neen (6) bazeia ba polítika Ajénsia TIC TIMOR I.P nian. Iha momentu oportunu ida ne’e Diretór mós hasoru malu ho Prezidente Autoridade Munisípiu Aileu, sr. Abel da Conceição hodi aprezenta Helpdesk foun ne’ebé destaka iha munisípiu Aileu. Diretór Divizaun Sistema Aplikasaun ne’e mós esplika kona-ba lalaok servisu husi pesoál Helpdesk nian, ne’ebé kontinua husi servisu dahuluk ne’ebé mak pesoál Helpdesk antes hala’o tiha ona katak hodi asegura rede internet no aplikasaun atu bele lao ho diak. No hato’o mós katak husi halo rotasaun ida ne’e ho objetivu atu habelar liután sira nia sentidu nasionalizmu hodi aprende no iha koñesimentu kle’an ba iha situasaun, lalaok servisu nomos ambiente ba iha munisipais sira hotu, no TIC TIMOR mós prepara hela planu servisu iha munisípiu nian ne’ebé hein atu implementa iha tempu badak, informa Diretór ne’e. Iha tempu hanesan, sr. Prezidente mós apresia tebes ho planu Ajénsia TIC TIMOR I.P nian no hein katak bele aselera lalais hodi apoiu sira ninia servisu ho diak liu tan, apoiu hirak ne’ebé TIC TIMOR fornese durante ne’e diak tebes no husu atu nafatin mantein liña koordenasaun ne’ebé diak hanesan ho Helpdesk antes ne’e. Entretantu, Diretór Patrimóniu no Lojístika Administrasaun Munisipál Aileu, sr. Xisto de Jesus hateten, ninia parte agradese tebes ho funsionáriu Helpdesk ne’ebé durante ne’e apoiu ona sira halo servisu ho diak, dala ruma hetan difikuldade tanba impaktu husi eletrisidade ne’ebé mate lakan, iha parte seluk servisu hotu la’o ho diak tanba Helpdesk TIC TIMOR I.P koopera diak ho funsionáriu sira hotu iha administrasaun munisipál nian, tenik Diretór ne’e ba Media TIC. #Média#TIC