TIC TMOR I.P ATRIBUI SERTIFIKADU BA PARTISIPANTE 24 HUSI INSTITUISAUN ESTADU 16

Ajénsia Tecnologia da Informação e Comunicação (TIC) TIMOR I.P, atribui sertifikadu ba partisipante na’in 24 husi instituisaun estadu 16 ne’ebé tuir treinamentu kona-ba rede nian durante semana rua iha Centru Formasaun Polísia, Comoro. Treinamentu ne’ebé TIC TIMOR fasilita, espesífiku liu iha área IT liga ba rede nomós halo konfigurasaun kona-ba ekipamentu rede nian. Iha serimónia enserramentu ne’e, Diretór Ezekutivu TIC TIMOR I.P, Roberto Caitano de Sousa Vicente hatete, liu husi treinamentu ne’e, bele fó ona fundamentu no koñesimentu iha área rede nian, ba pesoál IT husi instituisaun 16. Hein katak, sira iha koñesimentu naton husi treinamentu ida ne’e, maibé treinamentu refere sei la hotu iha ne’e. Ida ne’e, hanesan pasu primeiru no oportunidade treinamentu barak liu ne’ebé maka sei oferese husi TIC TIMOR tanba Ajénsia ne’e, harii ho nia kompeténsia ida maka atu fó treinamentu ba pesoál IT sira iha instituisaun estadu tomak. “Ida ne’e, la’ós foin hahú ita sei halo tan treinamentu ida husi Divizaun Infraestrutura no husi Divizaun Aplikasaun. Sira sei halo treinamentu ba área aplikasaun nian atu aprende kona-ba programasaun iha área informátika nian,” Informa Xefe Ezekutivu. Iha fatin hanesan, Tiago dos Santos Fernandes, nu’udar partisipante husi PNDS, iha esperansa katak, bainhira nia parte tuir treinamentu ne’ebé Governu oferese liu husi TIC TIMOR I.P bele hasa’e koñesimentu di’ak liu-liu iha área IT nian kona-ba rede atu nune’e, bele implementa iha sira nia servisu fatin hodi bele garantia nafatin funsionamentu servisu liu-liu iha ministériu idak-idak atu bele la’o di’ak liu tan. Alende ne’e, Inspetór xefe CFP, Jacinto da Conceição, agradese ba TIC TIMOR tanba bele hili CFP sai parseiru ba formasaun tuir programa TIC TIMOR nian. Hein katak, ida ne’e la’ós ikus ona ba kooperasaun servisu tanba CFP mós presiza TIC TIMOR nia apoiu ba programa sira ne’ebé iha. Espera katak programa sira ne’ebé, planeia ona bele realiza duni nune’e bele apoiu mós CFP liu-liu iha área informátika. #MÉDIA TIC#