TIC TIMOR I.P. NO MTKI ASINA AKORDU KOOPERASAUN BA KOMPONENTE TOLU

Ajénsia Tecnologia da Informação e Comunicação (TIC) TIMOR I.P., ho Ministériu Turizmu Komérsiu no Indústria (MTKI) asina akordu kooperasaun ba servisu iha área informátika nian espesífiku liu ba komponente tolu. Komponente tolu ne’e hanesan, fornese no jere hosting website MTKI, Dezeñu, dezenvolve no asegura Sistema KoBoToolbox liuhusi kf.kobo.apps.gov.tl hodi kria formuláriu eletróniku tuir nesesidade, servisu email ofisiál MTKI nian ho denominasaun MTCI.GOV.TL (xxx@mtci.gov.tl). Iha diskursu, Diretór Ezekutivu TIC TIMOR I.P., Roberto Caitano de Sousa Vicente, agradese ba MTKI, ne’ebé fó-konfiansa no fiar ba TIC hanesan Tékniku Timor-oan, ne’ebé iha ona koñesimentu ne’ebé di’ak tebes, hodi fornese solusaun Informátika ba MTKI. Agradese mós ba tékniku sira hosi Instituisaun Governu nian ne’ebé iha kolaborasaun di’ak tebes nune’e hahú marka istória foun ida-ne’e hodi la’o ba futuru. Ho asinatura nota entendimentu no akordu nivel servisu sira-ne’e, MTKI hola parte hamutuk ho Ajénsia Estadu haatnulu resin ona (40 resin) ne’ebé maka daudaun ne’e uza hela servisu informátika iha TIC, inklui iha área oin-oin, iha hanoin ida katak hahú hosi asinatura MoU ida ne’e, bele loke dalan ba kooperasaun iha área barak liutan ba iha futuru iha ámbitu servisu informátika nian. Alende servisu hirak ne’e, TIC TIMOR mós apoia MTKI liuhusi Vise-Ministru Komérsiu no Indústria nian hodi prepara ezbosu lei ba E-Commerce inklui e-transactions, kódigu propriedade intelektuál no direitu autór. Iha fatin hanesan Ministru Turizmu Komérsiu no Indústria, José Lucas do Carmo da Silva hato’o, kongratula ba loron istóriku ida-ne’e, liuhusi VIII Governu konstitusionál bele rezolve kestaun efisiénsia servisu iha Governu ida ne’e. Eventu ida-ne’e hanesan indikadór ida MTKI hakat ba oin hamutuk ho TIK TIMOR no oinsá bele aproveita fasilidade teknolojia ne’ebé eziste ona hodi tulun MTKI liuhusi levantamentu dadus, jestaun ba baze dadus no publikasaun. Asaun ida-ne’e hola parte ba governasaun di’ak ne’ebé iha relasaun ho prosesu hamosu planu ka desizaun ruma bazeia liu ba evidénsia no fatin atu partilla informasaun no simu sujestaun sira hodi hadi’ak liu tan knaar sira no servi MTKI, no apresia tebes ho TIC TIMOR nia apoiu tomak durante ne’e, ho realizasaun faze inísiu ida-ne’e. Entretantu nota entendimentu refere, asina direta hosi Ministru Komérsiu Indústria, José Lucas do Carmo da Silva ho Diretór Ezekutivu Ajénsia TIC TIMOR I.P., Roberto Caitano de Sousa Vicente. Iha biban ne’e, asina mós akordu ba nivel servisu tékniku ne’ebé asina hosi Xefe Divizaun sira hosi TIC TIMOR I.P. nian nomós Diretór sira hosi MTKI. #MÉDIA TIC#