TIC TIMOR I.P NO MINISTÉRIU SAÚDE ASINA MEMORANDU ENTENDIMENTU BA KOOPERASAUN IHA ÁREA INFORMÁTIKA

Ajénsia Tecnologia da Informaçãso e Comunicação (TIC) TIMOR I.P., asina Nota Entendimentu ho Ministériu Saúde (MS) ba kooperasaun servisu iha área informátika liu-liu kona-ba atu dezenvolve fali website foun ba MS, hodi garante seguransa ba asesu, sentraliza dadus ministériu nian, fó treinamentu ba pesoál tékniku sira inklui fó apoiu ba ministériu refere hodi dezenvolve aplikasaun sira ne’ebé presiza. Iha entrevista ho jornalista sira, Diretór Ezekutivu TIC TIMOR I.P., Roberto Caitano de Sousa Vicente, informa, Nota Entendimentu ne’ebé asina ho Ministériu Saúde, atu formaliza de’it relasaun balun ne’ebé maka durante ne’e la’o tiha ona. MS loloos hanesan kliente tuan TIC TIMOR nian hahú iha tinan 2018. Servisu sira ne’ebé antes ne’e fornese hanesan E-mail ofisial no seluk tan. “Agora ho nota entendimentu ne’e, alarga tan pontu prinsipál lima, maka ajuda sira atu dezenvolve fila fali sira nia website, garante seguransa ba asesu aplikasaun sira iha sentru de dadus TIC TIMOR nian, liga ba ministériu saúde nian, rai sira nia dadus iha sentru dadus TIC TIMOR inklui treinamentu pesoál IT iha ministériu saúde, la’ós iha Dili de’it mai alarga iha territóriu tomak,” informa Diretór Ezekutivu. Xefe Ezekutivu ne’e esplika, nota entendimentu ne’e, laiha prazu baba’in halo revizaun ka hakarak termina halo de’it notifikasaun. Iha fatin hanesan Ministra Saúde, Odete Maria Freitas Belo, iha nia diskursu hatete, Ministériu Saúde atu loke website hodi asegura dadus ministériu nian tanba durante ne’e, MS uza internet privadu ne’ebé maka la asegura dokumentu sira husi Ministériu Saúde. Entretantu Memorandu Entendimentu ne’e, asina Diretamente husi Ministra Saúde, Odete Maria Freitas Belo no Diretór Ezekutivu Ajénsia TIC TIMOR I.P., Roberto Caitano de Sousa Vicente, iha ámbitu loron saúde nasionál nian iha kampu Ladi Suku Camanasa Munisípiu Kovalima. #MÉDIA TIC#