TÉKNIKU AJÉNSIA TIC TIMOR I.P VIZITA SEJD HODI ESPLIKA KONA-BA KONEKSAUN REDE FIBRA ÓTIKA TERRESTRE

Ekipa tékniku Ajénsia Tecnologia da  Informação e Comunicação (TIC) TIMOR I.P hala’o vizita ba Sekretaria Estadu Juventude no Desportu (SEJD) liu husi Departamentu IT, hodi halo esplikasaun kona-ba koneksaun rede Fibra Ótika Terrestre (FOT) no ezisténsia Ajénsia nian atu nune’e iha futuru bele halo kooperasaun servisu iha governasaun eletróniku hodi minimiza kustu orsamentu ba asesu konteúdu lokál .

Iha sorumutu ne’e, Diretór Aplikasaun Justo Fernndes esplika, Ajénsia ne’e harii atu responde nesesidade instituisaun governu nian, tanba iha planu estratéjiku dezenvolvimentu nasionál ne’ebé ko’alia kona-ba governu eletróniku. Ho ida ne’e instituisaun refere, esforsu oinsá bele aplika iha Timor-Leste.

Nia dehan, dadus governu nian iha hotu rai liur tanba seidauk iha infraestrutura sufisiente no aplikasaun dezenvolve mós husi liur. Tanba ne’e TIC TIMOR I.P foti kauza husi Ministériu hotu-hotu, hodi kria governu eletróniku. Timor-Leste agora dadauk, iha sistema barak no iha portal ne’ebé barak tanba ne’e, sei halo single portal ida, nune’e bele sai nu’udar fontes governu nian no sei akumula informasaun sira husi portal ministériu sira nian, hodi sai hanesan portal úniku no informasaun hotu akumula iha portal ne’e.

Iha fatin hanesan, ekipa tékniku Infraestrutura mós aprezenta, ezisténsia Instituisaun Públiku ne’e nian nomós instalasaun ne’ebé halo ona. Ajénsia ne’e, eziste iha tinan 2017 bazeia ba dekretu lei 29/ 2017 no relata diretamente ba Gabinete Primeiru Ministru. Ajénsia ne’e hanesan institutu públiku no  halo ona instalasaun rede Fibra Ótika Nasional ho nia objetivu, atu kria rede governu nian rasik ba Munisípiu no kobre mós iha Dili, liu husi Oli Pezadu ne’ebé liga husi tore EDTL hodi  dada tutan husi sub estasaun sira ba Autoridade Munisípiu no iha futuru sei sai distributor iha munisípiu idak-idak.

Vantajen husi projetu ida ne’e, atu halo governu la depende ba operadór telekomunikasaun ne’ebé eziste iha TL, no redús kustu ba asesu konteúdu lokál sira, hanesan Dalan ba Futuru, ba planeamentu. Instituisaun Públiku ne’e mós, halo ona koneksaun ba liña Ministériu balun hanesan MOP, MS, MNEK, MRLAP no GPM.

Rede ne’ebé agora fahe ba Munisípiu iha zona tolu no zona ida kompostu husi Dili, Manatutu, Aileu no Ermera. Zona rua husi Baukau, Lautem, Vikeke, no zona tolu hanesan, Cova-Lima, Ainaru, Manufahi no Bobonaro. Projetu Fibra Ótika Terrestre ne’e, agora nia progresu to’o ona 90%.

Alende ne’e, Xefe Departamentu IT Ananias Pinto, mós halo introdusaun kona-ba, sira nia Departamentu ne’ebé eziste ona tinan 10 no atividade barak maka halo ona ba juventude sira hanesan formasaun kona-ba IT, kria aplikasaun ba suku sira nomós espozisaun ba IT.

Nia haktuir, posibilidade balun ne’ebé sei hato’o atu koopera tanba sira akompaña servisu TIC TIMOR I.P nian liu husi pájina Ajénsia nian. Tanba ne’e sira hatene di’ak kona-ba progresu servisu instituisaun ida ne’e nian, no esplikasaun hirak ne’e loloos kedas ho informasaun ne’ebé sira asesu tanba ne’e sira nia parte sente la’ós foun ba sira.

Entretantu, Sira mós presiza tebes atu asesu ba koneksaun rede Fibra Ótika Terrestre (FOT) hodi fasilita servisu SEJD nian.#Média TIC#