DIRETÓR EZEKUTIVU TIC TIMOR I.P. OFISIALMENTE ENTREGA PESOÁL DESTAKADU IHA MUNISÍPIU AINARU

Diretór Ezekutivu Ajénsia Informação e Comunicação (TIC) TIMOR I.P., Roberto Caitano de Sousa Vicente, hamutuk ho ekipa ofisialmente entrega pesoál foun ne’ebé maka destaka iha Munisípiu Ainaru, bazeia ba planu TIC TIMOR nian ne’ebé, kada fulan neen halo rotasaun husi munisípiu ida ba munisípiu seluk. Objetivu husi rotasaun ne’e, atu bele hatoman funsionáriu sira nia aan ho ambiente servisu ne’ebé maka diferente ho ema ne’ebé maka diferente no sira prontu atu servisu iha ne’ebé de’it. Iha sorumutu ne’e, Xefe Ezekutivu agradese ba autoridade munisípiu Ainaru, ne’ebé durante ne’e, fasilita pesoál TIC TIMOR nian ne’ebé destaka iha munisípiu Ainaru tanba sira bele servisu iha kondisaun ne’ebé maka dignu hodi asegura sira nia servisu di’ak iha munisípiu ida ne’e. Tuir planu ne’ebé iha, tinan oin TIC TIMOR mós iha planu atu destaka tan pesoál tékniku ida ba iha kada munisípiu hodi haree ba dezenvolvimentu sistema aplikasaun hanesan, dezenvolve baze de dadus sira ne’ebé bele halo atendementu lais liu tan ba populasaun sira iha munisípiu. Tanba haktuir planu Governu nian kona-ba desentralizasaun tan ne’e, TIC TIMOR mós desentraliza servisu balun ba to’o iha munisípiu. Iha biban ne’e Diretór Finansas iha Munisípiu Ainaru, Ruivo Magno hatete, sira nia parte sente kontente tanba durante ne’e, servisu hamutuk ho pesoál sira husi TIC TIMOR di’ak tebes liu-liu iha parte tékniku nian no ajuda mós durante ne’e iha tempu pandemia nian, sira fasilita administrasaun munisípiu hodi hala’o enkontru via online ho superior sira iha nasionál. Nia mós haktuir katak, ida ne’e priviléjiu boot tanba TIC TIMOR bele destaka ona pesoál tékniku sira ba iha munisípiu tanba durante ne’e, munisípiu Ainaru menus rekursu iha área IT nian. #MÉDIA TIC#