DIRETÓR EZEKUTIVU TIC TIMOR I.P HALA’O ENKONTRU PRELEMINÁRIU HO VISE MTKK

Diretór Ezekutivu Ajénsia Tecnologia da Informação e Comunicação (TIC) TIMOR I.P, Roberto Caitano de Sousa Vicente ho ekipa hala’o enkontru prelemináriu ho Vise Ministra Turizmu Komunitáriu no Kulturál (MTKK), Inácia da Conceição Teixeira ho nia ekipa, iha salaun MTKK Faról Dili.

Objetivu husi enkontru ne’e, atu halo introdusaun badak nomós atu identifika kona-ba oinsá atu bele fó apoiu ba ministériu refere, hodi hahú sentraliza sistema informátika iha Ajénsia TIC TIMOR I.P.

Iha sorumutu ne’e, mós hanesan oportunidade di’ak atu bele hatene loloos oinsá TIC TIMOR I.P bele fó apoiu di’ak liu iha Ministériu ida ne’e nomós ministériu seluk.

Alende ne’e, Xefe Ezekutivu mós halo aprezentasaun kona-ba ezisténsia TIC TIMOR, servisu ne’ebé Ajénsia atinje ona, progresu servisu ne’ebé la’o hela inklui planu servisu ne’ebé TIC TIMOR sei halo iha futuru.

Ho nune’e Vise Ministra Turizmu Komunitáriu no Kulturál (MTKK) Inácia da Conceição Teixeira hatete, MTKK iha problema kona-ba website tanba ne’e, husu atu TIC TIMOR maka zere.

Nia dehan, MTKK mós iha dadus barak kona- ba sítiu turístiku no iha rekomendasaun atu fó sai maibé laiha sistema dijitalizasaun hanesan baze de dadus tanba ne’e, karik bele dezenvolve sistema base de dadus ida, atu nune’e bele hadi’a servisu iha Ministériu refere.

Sira nia parte mós konkorda ho papél TIC TIMOR nian, tanba importante tebes atu asegura  dadus nasaun nian no Presiza  mós kria email ofisial ida . #MÉDIA TIC#