AJÉNSIA TIC TIMOR I.P, NO MAE HALA’O KOOPERSAUN SERVISU IHA ÁREA INFORMÁTIKA

Ajénsia Teknolojia Informasaun no Komunikasaun, sigla português (TIC) TIMOR I.P., no Ministériu Administrasaun Estatál (MAE) asina Nota Entendimentu ba kooperasaun servisu iha área informátika.  

Objetivu hosi asinatura Nota Entendimentu no SLA ne’e, atu fasilita komponente  sira  hanesan, Virtual Private Server (VPS) hodi host servisu sistema ka aplikasaun “Portal Munisipál”;  Konetividade Internet no Konetividade Lokál ba asesu Konteúdu Governu nian hanesan, Free-balance/GRP, DBFT (Dalan ba Futuru) no Portal Transparénsia  Governu nian  ba  Edifísiu Administrasaun Munisípiu 12;  Apoiu Pesoál Tékniku hanesan, Helpdesk ba iha Edifísiu Administrasaun Munisípiu 12; Servisu ba Sistema Aplikasaun, web-hosting no servisu nesesáriu sira seluk ne’ebé presiza atu dezenvolve no fornese iha future.

Iha diskursu Diretór Ezekutivu TIC TIMOR I.P., Roberto Caitano de Sousa Vicente, agradese ba MAE ne’ebé fó konfiansa ba TIC TIMOR I.P., hanesan Tékniku Timor-oan, ne’ebé iha ona koñesimentu di’ak tebes hodi fornese solusaun informátika ba MAE ne’ebé hahú halo kolaborasaun di’ak nune’e ohin ita hahu marka pasu foun ida hodi la’o ba futuru ho polítika Governu-Eletróniku.

Nia dehan, “ TIC TIMOR I.P. entende papél importante MAE nian ne’ebé, responsavel ba área podér lokál, desentralizasaun Administrativa, fó apoiu ba organizasaun komunitária sira, promosaun dezenvolvimentu lokál, organizasaun no ezekusaun husi prosesu eleitorál no referendáriu nian sira, promosaun ijiene no organizasaun urbana no klasifikasaun no konservasaun dokumentu ofisiál sira ho valór istóriku, razaun sira ne’e, kooperasaun Servisu Teknolojia, Informasaun no Komunikasaun (TIC) importante tebes ba papél MAE nian,  tanba TIC bele dezenvolve tuir nesesidade MAE nian iha kurtu, médiu no longo prazu hodi fasilita di’ak liu tan prestasaun servisu ba komunidade iha nivel rurál no nasionál”. Ajénsia TIC TIMOR bele transforma servisu MAE nian ne’ebé iha agora ba eletróniku, liuhosi utilizasaun servisu Teknolojia, Informasaun no Komunikasaun.

Liuhosi servisu hamutuk ida ne’e, MAE mós sei kontribui ba esforsu TIC TIMOR I.P. nian servisu hodi hamenus gastu la-nesesáriu sira iha área Informátika, sentraliza no asegura dokumentu no informasaun iha Sentru-dadus Governu Eletróniku nian, fasilita asesu ba padraun Teknolojia no aplikasaun ne’ebé modernu, seguru, atualizadu, dezenvolvidu no asegura husi Timor-Oan rasik.

“Ho asinatura Nota Entendimentu ida ne’e no ba futuru sei kontinua ho akordu nivel servisu sira seluk, MAE hola parte hamutuk ho Ajénsia Estadu haatnulu resin ualu ona (48 resin ona) ne’ebé maka agora daudaun uza hela servisu informátika iha TIC TIMOR no iha área oin-oin, tan ne’e fiar katak, hahú hosi asinatura MoU ida ne’e, bele loke dalan ba kooperasaun iha área barak liu-tan bá futuru iha ámbitu servisu informátika nian hodi garantia konetividade liña internet nivel lokal iha edifísiu  munisípiu 12 no asesu ba konteúdu governu nian,” nia informa.

Iha fatin hanesan Diretór Jerál Desentralizasaun Belarmino Filomeno Neves, lori Ministru Administrasaun Estatál Sr. Miguel Pereira de Carvalho nia naran, agradese no apresia ba kontinuasaun servisu parseria entre TIC TIMOR, UNDP, MAE nomós munisípiu sira hodi bele estabelese plataforma informasaun ho dadus ne’ebé bele utiliza ona.

Portal munisipál hanesan komponente ida hosi projetu Uniaun Europeia no UNDP nian ho naran haforsa dezenvolvimentu lokál integradu hodi hasa’e kapasidade autoridade munisipál iha Timor-Leste ne’ebé implementa kolaborasaun ho MAE, Parlamentu Nasional nomós munisípiu sira hotu.

“Portal munisipál lansa ona iha fulan Marsu tinan 2020 ne’ebé serve hanesan plataforma interna ida hodi monitoriza progresu dezenvolvimentu iha munisípiu sira to’o nivel suku,” nia  informa

Nia dehan, portal ida ne’e sei sai hanesan plataforma hodi bele ajuda Governu nasionál nomós lokál ba servisu planeamentu orsamentál, monitorizasaun no oinsá utiliza evidénsia ba halo desizaun iha nivel altu nian nomós sidadaun hotu iha munisípiu bele asesu ba kualkér dadus, dezenvolvimentu informasaun iha munisípiu sira atu ajuda hodi promove di’ak liu tan transparénsia no akontabilidade no hasa’e boa-Governasaun. Ho feremanta sira ne’e, bele ajuda ema hotu atu bele iha espasu hodi fó komentáriu no hetan informasaun ba kada munisípiu iha Timor-Leste.

Nota entendimentu ne’e asina hosi  Diretór Ezekutivu TIC TIMOR I.P., Roberto Caitano de Sousa Vicente no Diretór Jerál Desentralizasaun Belarmino Filomeno Neves, akompaña hosi reprezentante hosi UNDP, Sr. Yam no Bernadino.

Entretantu serimónia ne’e realiza tanba servisu hamutuk entre Ministériu Administrasaun Estatál (MAE) no UNDP ho nia projetu Strengthening Integral Local Development. #MEDIA TIC#