AJÉNSIA TIC TIMOR I.P HALO ROTASAUN BA FUNSIONARIU HELPDESK IHA MUNISIPIU MANUFAHI

Ajénsia Tecnologia da Informação e Comunicação (TIC) TIMOR I.P, halo rotasaun ba funsionáriu Helpdesk iha munisípiu Manufahi, rotasaun funsionáriu ne’e bazeia ba polítika Ajénsia TIC TIMOR I.P nian. Rotasaun ba funsionáriu Helpdesk iha munisípiu Manufahi ne’e akompaña husi Vise Diretór Ezekutivu, Justo Fernandes, iha biban ne’e Vise Diretór mós hala’o enkontru ho Prezidente Autoridade Munisípiu Manufahi, Sr. Arantes Isac Sarmento, hodi aprezenta funsionáriu Helpdesk no esplika kona ba lala’ok servisu husi pesoál Helpdesk nian, ne’ebé mak kontinuasaun husi servisu dahuluk ne’ebé mak pesoál Helpdesk antes hala’o tiha ona katak hodi asegura rede internet no aplikasaun atu bele la’o ho diak. Diretór ne’e mós hato’o katak husi halo rotasaun ida ne’e hanesan polítika ajénsia TIC nian ho objetivu atu habelar liután sira nia sentidu nasionalizmu hodi aprende no iha koñesimentu kle’an ba iha situasaun, lala’ok servisu nomos ambiente ba iha munisípiu sira hotu. Durasaun ba rotasaun ida ne’e sei hala’o to’o fulan neen (6). Diretór mós agradese ba Presidente autoridade munisípiu Manufahi tanba simu ona prezensa TIC TIMOR I.P nian iha ninia edifísiu. Iha biban ida ne’e sr. Prezidente Munisípiu Manufahi mós hato’o bem vindo ba pesoál Helpdesk foun no agradese ba Ajénsia TIC TIMOR hodi halo tipu servisu rotasaun ida ne’e, autoridade munisipiu mós hato’o ninia sentidu kontente bainhira ajénsia TIC TIMOR oferese pesoál Helpdesk iha fatin ida ne’e tanba sira nia servisu diak tebes no fó apoiu diak tebes, ajuda ona maluk barak ne’ebé mak presiza no dala ruma laos deit hala’o servisu iha servisu fatin, maibé ema bolu sira ba ajuda halo servisu fatin seluk, tanba iha servisu fatin refere koñese sira hotu, Presidente ne’e mós agradese tebes, tanba iha kolaborasaun servisu ne’ebé diak entre Helpdesk TIC, IT UNDP no staff IT seluk ne’ebé maka servisu iha edifísiu Administrasaun Munisipál nian. #Media#TIC