AJÉNSIA TIC TIMOR I.P., ATRIBUI SERTIFIKADU APRESIASAUN BA FUNSIONÁRIU IT LNS

Ajénsia Teknolojia Informasaun no Komunikasaun, sigla português (TIC) TIMOR I.P., liuhosi Divizaun Dezenvolvimentu Sistema Aplikasaun (DSA), atribui sertifikadu apresiasaun ba funsionáriu na’in 2 hosi Laboratóriu Nasionál Saúde (LNS) I.P., ne’ebé tuir treinamentu oinsá atu jere website.      

Sertifikadu refere fahe direita husi Vise-Diretór Ezekutivu TIC TIMOR I.P., Justo Fernandes hanesan mós Diretór Divizaun Dezenvolvimentu Sistema Aplikasaun, iha biban ne’e, Diretór informa, treinamentu ida ne’e hanesan apoiu téknika ne’ebé TIC TIMOR fó hanesan kontinuasaun husi akordu ne’ebé maka LNS no TIC asina tiha ona iha fulan kotuk liubá.

“Treinamentu ba loron tolu ida ne’e hanesan kontinuasaun hosi akordu ne’ebé maka ita asina iha fulan kotuk liubá, ida ne’e parte husi apoiu téknika ne’ebé TIC fó no solusaun kompletu ne’ebé TIC TIMOR fornese komesa husi dezenvolvimentu sistema, fó treinamentu, no apoiu téknika nomos manutensaun ba iha sistema” dehan Diretór.  

Diretór realsa tan katak, Padraun ida ne’e TIC aplika ba Instituisaun hotu iha Timor-Leste, no bainhira remata treinamentu ida ne’e Ajénsia TIC sei fó nafatin apoiu téknika liuhosi konsultasaun, difikuldade ruma bainhira atu atualiza informasaun ba iha website nomos halo mudansa balun ne’ebé nesesáriu, téknika TIC prontu atu ajuda iha parte ida ne’e, hatete Diretór DSA.

Vise Diretór ne’e haktuir katak, servisu sira ne’ebé TIC fó intermus dezenvolvimentu sistema laos de’it iha área website maibé sistema seluk mós TIC fornese, alende ne’e husi parte Saúde mós husu atu TIC dezenvolve sistema informasaun ba hospital nian, ne’ebé agora daudaun iha prosesu nia laran, ida ne’e maka fleksibilidade ne’ebé TIC TIMOR iha, importante maka hakarak duni atu servisu, husi parte Ajénsia nian ne’ebé hala’o knar atu implementa Governu Eletrónika oinsá atu transforma sistema Governu iha Timor-Leste ne’e sai nudar Governu Eletrónika ne’ebé utiliza sistema hirak ne’e atu dezamina informasaun sira hosi ita nia sidadaun tantu ba iha mundu internasionál, informa Diretór.

Iha fatin hanesan, Diretór Administrasaun Apoiu no Finansas, Laboratóriu Nasionál Saúde (LNS) I.P., Liborio da Costa Alves, hato’o agradese ba Ajénsia TIC TIMOR liu-liu tékniku sira ne’ebé fó ona tempu hodi fó treinamentu ba IT LNS.

“Lori LNS nia naran hato’o obrigado barak ba ekipa Ajénsia TIC tanba durante ne’e servisu hamutuk hodi apoiu treinamentu ne’e to’o ohin loron, agradese tebes iha ona kontribuisaun ba treinamentu iha parte IT nian, ba oin ami nia parte sei partisipa másimu liu tan. Iha parte balun ami presiza nafatin apoiu husi TIC, no nafatin kolabora iha parte IT nian hodi lori IT ba oin no agradese tebes ba tékniku sira tanba fó ona treinamentu ba IT LNS no ohin loron bele remata hodi entrega sertifikadu, fiar katak ba oin sei barak liu tan mak partisipa iha treinamentu ne’e”, dehan Diretór ne’e.

Iha biban ida ne’e, IT LNS, Antonio Zeferino da C. P Barreto, hateten, iha treinamentu durante loron tolu refere sira aprende matéria barak hosi tékniku TIC TIMOR nian oinsá atu jere website, imajen nomos tabela, tanba ne’e hanesan IT LNS nian hato’o obrigado barak ba parte TIC liu-liu ba treinadór ne’ebé durante loron tolu ho pasiénsia akompaña ona hodi fahe matenek. Sertifikadu ne’e fahe iha edifísiu Laboratóriu Nasionál Saúde (LNS) I.P., Bidau Dili. #Média #TIC.