ADMINISTRADÓR MANATUTU AGRADESE HO PREZENSA HELPDESK NIAN HODI BELE APOIU SERVISU TÉKNIKU

Relasiona ho polítika Ajénsia Tecnologia da Informação e Comunicação (TIC) TIMOR I.P, nian ne’ebé halo rotasaun ba funsionáriu sira iha munisípiu 12 kada fulan neen, Diretór Ezekutivu TIC TIMOR I.P, Roberto Caitano de Sousa Vicente entrega funsionáriu destakadu ba Administradór Munisípiu Manatutu, Bernardo Lopes, hodi apoiu servisu informátika iha munisípiu Manatutu. Iha sorumutu ne’e, Autoridade Munisipál ne’e, agradese ho prezensa helpdesk iha munisípiu refere hodi fó apoiu servisu tékniku tanba atu tama ba desentralizasaun, munisípiu Manatutu presiza tebes rekursu umanu atu apoiu servisu. Nia dehan, atu tama ba desentralizasaun ida ne’e, asuntu ne’ebé importante no ida ne’e, maka sai difikuldade boot ba munisípiu Manatutu inklui rekursu umanu sai hanesan parte ida ne’ebé sei falta tebes maibé, Manatutu agradese tebes ba TIC TIMOR tanba bele apoiu ona pesoál tékniku iha Manatutu hodi sai forsa de Traballu ida hodi servisu hamutuk ho munisípiu. Iha biban ne’e, Xefe Ezekutivu TIC TIMOR I.P, esplika, Ajénsia ne’e, nia papél importante atu haree kona-ba polítika informátika estadu tomak no haree mós kona-ba área infraestrutura hanesan konetividade, dezenvolvimentu aplikasaun sira iha área informátika. Ho nune’e polítika ne’ebé maka iha, haktuir mós polítika Ministériu Administrasaun Estatál nian liga ba desentralizasaun ho nune’e, TIC TIMOR mós desentraliza servisu balun mai iha Administrasaun Munisipál tanba ne’e, maka koloka kedas pontu vokál iha kada Administrasaun. Entretantu, Diretór Ezekutivu afirma, polítika halo rotasaun ne’e atu funsionáriu sira hatoman aan mós ho tradisaun munisípiu idak-idak nian nomós hasa’e sentidu nasionalizmu ho nune’e, polítika ne’ebé maka iha halo rotasaun ba pesoál sira ne’e kada fulan neen halo rotasaun husi munisípiu ida ba munisípiu ida to’o sira domina hotu munisípiu 12 no iha futuru inklui mós Oecusse. Planu tinan oin sei dezloka tan funsionáriu ida atu apoiu ba sistema aplikasaun sira hanesan sistema baze de dadus no seluk tan. Alende ne’e entrega mós relatóriu annual TIC TIMOR nian ba Administradór munisípiu Manatutu. #MÉDIA TIC#