ADMINISTRADÓR KOVALIMA HUSU TIC TIMOR I.P ATU AUMENTA PESOÁL TÉKNIKU HODI APOIU SERVISU INFORMÁTIKA

Relasiona ho polítika Ajénsia Tecnologia da Informação e Comunicação (TIC) TIMOR I.P. nian, ne’ebé kada fulan neen halo rotasaun ba pesoál tékniku iha Munisípiu 12 ho nune’e, Vise-Diretór Ezekutivu TIC TIMOR I.P., Justo Fernandes hala’o enkontru ho Administradór Munisípiu Kovalima, Francisco de Andrade, hodi aprezenta funsionáriu destakadu foun ne’ebé atu troka funsionáriu TIC TIMOR ne’ebé antes ne’e, destaka ona iha munisípiu Kovalima hodi fó apoiu tékniku. Iha sorumutu ne’e, Administradór Munisípiu Kovalima, agradese ba TIC TIMOR tanba bele destaka pesoál tékniku iha Kovalima maibé tékniku ida de’it la sufisiente atu kobre hotu iha área tékniku nian tanba ne’e, nia parte husu atu aumenta tan númeru IT nian atu nune’e servisu bele la’o di’ak liu tan. Autoridade munisipál ne’e informa, Munisípiu Kovalima laiha objesaun kona-ba pesoál ne’ebé maka lori ba apoiu iha Kovalima no importante maka ema Timor-oan ne’ebé atu halo servisu. “Ami mós aseita ho planu TIC TIMOR nian tenke iha rotasaun beibeik atu nune’e bele iha esperiénsia ba futuru bele di’ak liu tan,” dehan nia. Nia afirma katak, Kovalima prontu atu servisu hamutuk ho TIC TIMOR I.P. tanba oras ne’e dadauk, sistema dijitalizasaun presiza ema nia koñesimentu liu-liu iha área IT tanba Timor-Leste sei menus utilizasaun teknolojia maibé ho prezensa TIC TIMOR nian iha Kovalima sira agradese tanba servisu bele la’o ho susesu. Hatán ba sujestaun ne’e, Vise-Diretór Ezekutivu TIC TIMOR I.P., Justo Fernandes hatete Ajénsia harii bazeia ba dekretu lei númeru 29/2017 ne’ebé, tutela diretamente ba Primeiru Ministru ho polítika ida ne’ebé, iha âmbitu Governu Eletróniku, sei koloka tan funsionáriu tékniku ba iha munisípiu sira tanba sistema balun presiza duni implementa hodi responde ba nesesidade Sistema aplikasaun tékniku nian hodi fortifika sistema dijitalizasaun administrasaun sira ba kada munisípiu halo servisu administrasaun nian iha efisiénsia liu tan. Nia esplika, iha ona rede Fibra Ótika Terrestre (FOT) ba iha munisípiu 12 no la’ós fornese rede de’it maibé liu husi rede lokál ne’e, fornese mós aplikasaun sira ne’ebé asesu to’o iha nivel munisípiu hanesan sistema Freebalance, sistema Dalan ba Futuru no koloka mós apoiu tékniku ba iha kada munisípiu ne’ebé tuir polítika Ajénsia nian tenke halo rotasaun iha kada fulan neen. Entretantu iha oportunidade ida ne’e, Diretór Divizaun Sistema Aplikasaun ne’e, informa mós ba Administradór katak, ekipa sei mai dala ida tan atu foti rekizitu hodi dezenvolve sistema kona-ba portal munisípiu nian. Agora dadauk iha ona portal munisipál maibé ida ne’e ba dadus informasaun de’it no públiku labele asesu, tanba ne’e Ajénsia sei dezenvolve sistema ida hanesan portal ne’ebé relasiona ho informasaun munisípiu nian sei tau hotu iha laran no ida ne’e presiza rekizitu ba kada munisípiu ninia no rekizitu sira ne’e automátikamente diferente tuir nesesidade munisípiu ida-idak nian. #MÉDIA TIC#